Sefydlwyd y Confensiwn gan y Prif Weinidog a'r Dirprwy Brif Weinidog i helpu i godi ymwybyddiaeth o sut y cawn ein llywodraethu yng Nghymru, ac i ysgogi dadl ledled Cymru ar bwerau deddfu: a ddylai fod gan Gynulliad Cenedlaethol Cymru bwerau deddfu sylfaenol ai peidio? 

Gwaith y Confensiwn fydd:

• Codi ymwybyddiaeth a gwella dealltwriaeth o'r trefniadau presennol ar gyfer llywodraeth ddatganoledig yng Nghymru. Beth sydd gennym ar hyn o bryd o dan Ran 3 o Ddeddf Llywodraeth Cymru 2006, a beth fyddai symud i Ran 4 yn ei olygu? Beth yw'r goblygiadau ar gyfer llywodraethu Cymru yn y dyfodol?
• Hwyluso ac ysgogi dadl eang, trylwyr a chyfrannol ar bob lefel o gymdeithas yng Nghymru ar bwerau deddfu sylfaenol.
• Asesu lefel y gefnogaeth ymhlith y cyhoedd am roi pwerau deddfu sylfaenol i Gynulliad Cenedlaethol Cymru.
• Adrodd ar ei ganfyddiadau, gydag argymhellion sy'n berthnasol i gynnal refferendwm.

Ein gwaith ni yw eich helpu chi i gael gwybodaeth a chymryd rhan. 

Rydym am i gymaint o bobl yng Nghymru â phosibl ddeall nod y Confensiwn a chymryd rhan ynddo, fel y gallwch gymryd rhan yn y ddadl fawr ar lywodraeth ddatganoledig a deddfu yng Nghymru. 

Mae eich barn yn bwysig i ni!  Mae'r ddadl ar bwerau'r Cynulliad yn berthnasol i bawb, gan fod gan y defnydd o bwerau'r Cynulliad y potensial i effeithio ar fywydau pawb mewn meysydd mor amrywiol ag iechyd, addysg, yr amgylchedd, yr economi, materion gwledig, diwylliant a chwaraeon - ymysg nifer o feysydd eraill.  

Ceir nifer o ffyrdd y gallwch fynegi eich barn i ni.  Mae gennym wefan, sydd â gwybodaeth am ein holl weithgareddau, a ffyrdd o gysylltu â ni - www.confensiwncymrugyfan.org. Neu gallwch ysgrifennu atom yn: Confensiwn Cymru Gyfan, Adeilad y Pierhead, d/o Cynulliad Cenedlaethol Cymru, Bae Caerdydd CF99 1NA.   

Fel arall, gallwch ymuno â'r ddadl drwy ymuno â'n grŵp Confensiwn Cymru Gyfan ar Facebook. 

Rydym hefyd yn cynllunio nifer o gyfarfodydd cyhoeddus o fis Ionawr ymlaen, felly cadwch lygad ar agor i weld pryd y byddwn yn eich ardal chi a dewch i ymuno â'r trafodaethau.

Cofiwch, mae'r Confensiwn ar gyfer pawb, a dyma'ch cyfle chi i gymryd rhan yn y ddadl. 

Mynnwch wybodaeth, mynnwch gymryd rhan!